Wednesday, April 21, 2010

KWELI KUTAKUA NA UCHAGUZI HURU ZANZIBAR?

Na Ally Saleh

Maisha yote siasa za Zanzibar zinakuwa za changamoto kubwa. Hata juhudi gani zichukuliwe bado kuna pingamizi kadhaa wa kadhaa zitazozuka. Baadhi ni za kihistoria lakini baadhi yake ni za kuundwa undwa na kulazimisha lazimisha.

Hivi sasa Zanzibar inapita katika michakato kadhaa muhimu. Mmoja ni ule wa kuelekea kufanyika kwa Kura ya Maoni, wa pili ni ule wa kuelekea katika Uchaguzi Mkuu wa nne lakini mchakato mkubwa zaidi utaotokana na kufanikiwa kwa michakato hiyo miwili ni mchakato wa
kujenga Zanzibar Mpya.

Wako baadhi ya watu wanapinga michakato ya Kura ya Maoni na Uchaguzi Mkuu na kwa hivyo pia wanapinga pia fikra ya kujenga Zanzibar Mpya ambayo itaepuka siasa za chuki, hasama na kuviza maendeleo ya nchi bila sababu yoyote ile ya msingi zaidi ya kuendekeza mawazo mgando na ya kale na dhana za ubaguzi bila ya kujijua.

Wakati huu kukiwa na zoezi la uandikishaji wapiga kura katika Daftari la Kudumu (DKWK) upungufu kadhaa umekuwa ukijitokeza ambao huo tunaweza kusema ni wa kimuundo na kiutendaji na ambao tunao watu wa kuwaonyeshea kidole na kuamini kuwa wapo ambao wanaweza kuwajibika kuurekebisha.

Kwa mfano, ingawa Tume ya Uchaguzi imesema kuwa itaandikisha wapiga kura kwa raundi au awamu mbili tu, lakini imejitokeza wazi kuwa kuna watu wengi hawajapata fursa ya kujiandikisha kwa kosa lisilokuwa lao, kwa maana ya kuzembea.

Kwa inavyoelekea haitakuwa busara kabisa kwa Tume hiyo kuwa kichwa ngumu kukataa wapiga kura kwa maelfu, kwa sababu yoyote ile ikiwa kweli inataka kuhakikisha kuwa kunakuwa na uchaguzi huru hapa Zanzibar.

Na kwa hivyo akili yangu inanipa kuwa kutakuwa na raundi au awamu ndogo ya tatu. Katika awamu hii si lazima uandikishaji ufanywe jimbo kwa jimbo, lakini unaweza kufanywa katika ngazi ya Wilaya ili kila
mwenye haki apate haki hiyo kwa sababu haitaingia akilini uchaguzi unaofanywa Oktoba uandikishaji umalizikie mwezi wa Mei. Itakuwa dhulma kubwa.

Lakini pia tunaweza kunyooshea kidole taasisi ya Vitambulisho kunyima au kuchelewesha vitambulisho kwa wananchi kadhaa na fikra za taasisi hiyo kukataa kuwa kuna tatizo hilo ni sehemu kubwa ya tatizo la watu wengi pamoja na mke kukosa vitambulisho si kwa sababu ya uzembe lakini
kwa kushindwa kufanya kazi kwa mfumo wa kupata vitambulisho.

Siamini kuwa watu ambao watapata vitambulisho vyao kwa mfano leo, wakose haki ya kujiandikisha na hivyo kupiga kura kwa uchaguzi ambao utafanyika mwezi Oktoba. Itakuwa ni dhuluma kubwa, kwa sababu hawa
watakuwa ni kwa maelfu.

Ila matatizo mengine yanayohusu uandikishaji hayahusu Tume ya Uchaguzi wala taasisi ya Vitambulisono lakini zaidi ni ya wanasiasa na hawa hatuna nafasi ya kuwabana zaidi ya kuwasema hivi sasa kama tunataka kweli kuwa na uchaguzi huru hapa Zanzibar.

Mara nyingi huwa inasemwa juu ya suala la kupandikiza wapiga kura. Mara nyingi huwa pia inatajwa kuwa hili linafanywa na vyama vyote vya siasa. Lakini kuanzia sasa nimeanza kuwa na msimamo kuwa kwa hali ya
Zanzibar si rahisi hata kidogo kwa chama chochote chengine kisichokuwa CCM kupenyeza wapiga kura katika Daftari la Wapiga Kura.

Na kama chama chengine kisichokuwa CCM kinaweza kufanya hivyo basi ni kwa nafasi ndogo sana, kwa siri sana kinyume na inavyofanywa na CCM kwa wingi, kwa uwazi na kwa jeuri kubwa kabisa. Hali hii haionyeshi
kuwa kutakuwa na uchaguzi huru hapa Zanzibar.

Tuliona mwanzo wa zoezi hili la wapiga kura jinsi Chama cha Mapinduzi kilivyohusishwa na upandikizaji huko Pemba na hata hali hiyo kuikolezwa na utumaiji wa vitisho kwa kupelekwa vifaru na kimojawapo kikapinduka miguu juu.

Jeuri iliyofanywa mwishoni mwa wiki katika Mji Mkongwe na watu amboa kwa dalili zote walikuwa wakifanya hivyo kwa kinga ya CCM na vyombo vya dola, haiwezi kusaidia kabisa kuwa na uchaguzi huru hapa Zanzibar. Pia ni dhulma kubwa ya kisiasa na usaliti wa demokrasia.

Mkuu wa Polisi wa Mkoa aliarifiwa na Mbunge wa Mji Mkongwe na hata kulalamikiwa kuwa Polisi wanashiriki katika kuwapa nguvu wageni wa jimbo kupata fursa ya kuandikwa ilhali hawana haki.

Wazi na mchana kweupe wapiga kura waliletwa kuja kupandikizwa katika vituo vya Mji Mkongwe na bila ya kificho chochote waliletwa kwa magari na pia kuwekwa katika jengo la CCM la tawi lake pale Shangani. Hata
kuna gari la Serikali ya Mapinduzi ya Zanzibar linalodaiwa kutumika kwa mujibu wa nambari zake.

Watu hawa waliletwa kwa magari pengine wakitokea mashamba lakini pengine pia wakitokea mitaa mengine kuja kujiandikisha ilhali wao wakijua na waliowaleta wakijua kuwa hawana haki ya kupiga kura katika jimbo hilo kwa sababu si wakaazi waliotimiza muda wa miaka mitatu
yaani miezi 36 kama sheria inavyosema.

Kwa mtu asiyejua mazingira na siasa za Zanzibar ataona hili haliwezekani. Kwani hakuna sheria, hakuna utaratibu au hakuna maafisa wa Tume? Vyote vipo lakini utekelezaji wake unaendeshwa kimatakwa na kwa hivyo Sheha ambaye ni afisa wa ngazi ya chini ya Serikali anavaa
jokho la CCM na anasimama kukataa wakaazi halali wasipige kura lakini anapitisha bila aibu wasiokuwa wakaazi kuandikishwa.

Mawakala wa vyama vya siasa wakati kama huu na katika mazingira ya kulazimisha wageni wa jimbo waandikishwe, huwa hawana haki ya kusema kitu na wale wanaothubutu wanatishwa, kondolewa kituoni na hata kukamatwa.

Pia mtu asiyejua siasa za Zanzibar atauliza CCM ipandikize wapiga kura Mji Mkongwe ili ipate nini? Ni kweli CCM inajua wazi wazi kuwa ina nafasi ndogo ya kulipata jimbo hilo kwa kura chache inazozipenyeza,lakini wadadisi wa siasa wanajua kuna lengo kubwa zaidi.

Lengo kubwa ni kulenga kupata wapiga kura wengi zaidi katika nafasi ya ugombezi wa Rais. Imeshuhudiwa katika chaguzi zilizopita wapiga kura wakipelekwa kwa magari kutoka kituo kimoja hadi chengine wakati wa upigaji kura na kwa hivyo kuongeza idadi ya wapiga kura kwa nafasi ya
Urais.

Kwa siasa Zanzibar husemwa “kichwa ndio muhimu” na kichwa ndio Urais ambapo vyama viko tayari kufanya lolote na zaidi kw aCCM ambayo haioti kabisa kuiachia nafasi hiyo na haiingia kabisa katika akili yao kuwa hilo linaweza kutokea.

Si kweli kuwa viongozi wa ngazi za juu wa CCM wala Serikali kuwa hawajui kinachoendelea na kama hawajui basi tuseme kuwa hawatimizi wajibu wao kama viongozi kwa sababu kama viongozi wanatakiwa wajue kinachotokea katika nchi.

Katika hali ya kuwepo Maridhiano ya kisiasa, mtu angetarajia kuwa Zanzibar itatupilia mbali vijisiasa vya kupandikiza wapiga kura,vijisiasa vya kuiba kura na vijisiasa vya kucheza na matokeo, wakati yote haya yameshaonekana yasipewe tena nafasi hapa Zanzibar, lakini
wapo watu bado wameganda katika mitizamo kama hiyo, ambapo naamini wanaungwa mkono na viongozi wenye sauti na maamuzi.

Sasa kama hali ni hii, hivi kweli tutarajie kuwa na uchaguzi huru ifikapo hapo Oktoba? Utakuwaje uchaguzi huru wakati kuanzia hivi leo wakaazi wa Mji Mkongwe wanajua hakika kuwa miongoni mwao wameandikishwa watu ambao si wakaazi wa jimbo hilo na kuwa watakuwa wapiga kura?

Jamani ninavyojua mie haramu haiji kwa matokeo tu, bali haramu inakuja toka katika mchakato. Na mchakato wa uchaguzi wa Zanzibar ushakuwa haramu toka mwanzo, uhalali wake utakuwepo kweli. Mimi siamini kabisa.

VYETI VYA NECTA KUWEKWA PICHA ZA MTAHINIWA


KUTOKANA na vitendo vya udanganyifu kukithiri kwenye vyeti vya kidato cha nne na cha sita, Baraza la Mitihani la Taifa (Necta), limeanza kuweka picha katika vyeti vya matokeo ya ngazi hizo za elimu, ili kuwawezesha wadau kumtambua mmiliki halali wa cheti.

Naibu Waziri wa Elimu na Mafunzo ya Ufundi, Mwantumu Mahiza, aliliambia Bunge mjini Dodoma kuwa picha hizo huwekwa kwa kompyuta hivyo haziwezi kuondolewa kirahisi na mtu yeyote.

Uwekaji huo wa picha katika vyeti utaanza na vyeti vya watahiniwa waliofanya mtihani wa kidato cha nne mwaka 2008 ambavyo vitachapwa Mei 2010.

Naibu Waziri huyo alisema hati za matokeo ya mitihani ya kidato cha nne 2009 nazo zimetolewa zikiwa na picha.

Alikuwa akijibu swali la Mbunge wa Konde, Dk Ali Tarab Ali (CUF), aliyehoji kwa nini vyeti vya kidato cha nne na sita visiwekwe picha ya mtahiniwa husika kwa kutumia kompyuta ili kuondoa tatizo la udanganyifu.

Mbunge huyo katika maelezo yake alidai baadhi ya vyeti vya matokeo ya mtihani wa kitaifa ya kidato cha nne na sita kutoka Necta, vinatumiwa na watu wengine wasio watahiniwa kwa ajili ya kutafuta ajira au nafasi za masomo nje.

Katika kujibu swali hilo, Mahiza alikiri kuwa ni kweli kwamba baadhi ya watu wasiokuwa waaminifu wamebainika kutumia vyeti vya matokeo ya mitihani ya kitaifa ya kidato cha nne na sita visivyokuwa vyao, kwa ajili ya kutafuta ajira au nafasi za masomo ya juu, jambo ambalo ni kosa la jinai.

Alitoa mwito kwa wananchi wote kuacha mtindo wa kutumia vyeti visivyokuwa vyao kwani kufanya hivyo kunawanyima wenye vyeti stahili zao na ni kutenda kosa la jinai.

Katila swali lake la nyongeza, Mbunge huyo wa Konde alidai kuwa suala la mtu kutumia cheti ambacho sio chake mara nyingi linafanywa kwa makubaliano na mwenye cheti husika, hivyo alitaka kufahamu pia hatua zinazochukuliwa na Serikali kwa wote walioshiriki kufanya udanganyifu huo.

Lakini kwenye majibu yake, Mahiza alisema kuwa kesi za kuuza cheti ni chache sana na mara nyingi kama Wizara ya Elimu na Mafunzo ya Ufundi, wanapata kesi za watu kupotolewa na huwa wanazipeleka Polisi ili zishughulikiwe.

Dk. SLAA AIBWAGA SERIKALI


HATIMAYE Mbunge wa Karatu, Dk. Willibrod Slaa (CHADEMA) ameibwaga serikali.

Ingawa ilikuwa imekana madai aliyotoa kuwa imechomeka kinyemela vipengele kwenye Muswada wa Sheria za Gharama za Uchaguzi uliosaniwa kwa mbwembwe kuwa sheria na Rais Jakaya Kikwete mwezi uliopita, juzi jioni iliurudisha bungeni ili kufanya marekebisho ya kuvinyofoa vipengele hivyo.

Muswada huo wa sheria ya marekebisho ya sheria mbalimbali wa mwaka 2010, ikiwemo Sheria ya Udhibiti wa Gharama za Uchaguzi, uliwasilishwa na Mwanasheria Mkuu wa Serikali, Frederick Werema.

Werema ndiye aliyekuwa ameahidi awali, Dk. Slaa alipoibua hoja hiyo, kwamba kama serikali ingegundua kuwa vifungu hivyo vilichomekwa kinyemela, ingeomba radhi na kuurudisha muswada bungeni ufanyiwe marekebisho; ingawa baadaye alimbeza mbunge huyo, akajiingiza katika malumbano ya kutoa “ufafanuzi” wa kilichotokea, akasema vifungu viliongezwa ili kutafsiri kilichokuwa kimepitishwa na Bunge.

Lakini kitendo cha serikali kurejesha Sheria ya Gharama za Uchaguzi kwa ajili ya marekebisho bungeni, kimetafsiriwa na wachambuzi wa masuala ya siasa nchini kuwa ni ushindi wa Dk. Slaa dhidi ya serikali.

Werema aliwasilisha muswada huo unaolenga kuzifanyia marekebisho sheria 16 zilizotungwa na Bunge, ikiwemo sheria namba 6 ya mwaka 2010.

Moja ya vipengele vilivyofanyiwa marekebisho ndani ya sheria hiyo, ni pamoja na kifungu cha timu ya mgombea kuhakikiwa na msajili wa vyama vya siasa, kilichokuwa kinalalamikiwa na Dk. Slaa. Sasa kimeondolewa.

Dk. Slaa katika madai yake, alikuwa amepinga kifungu hicho kwa madai kuwa kinakwenda kinyume cha misingi ya demokrasia, kwani timu za wagombea zingeweza kuondolewa kwa utashi wa msajili au ofisa mtendaji wa kata.

Akitetea uamuzi mpya wa serikali dhidi ya kauli yake ya awali, Werema alisema: “Kilichojitokeza bungeni kama inavyoonekana katika ‘Hansard’ (kumbukumbu za Bunge) ya Februari 11, 2010 kwa nia njema na kwa kuzingatia taaluma ya uandishi, tuliona kwamba kuidhinishwa kwa wajumbe wa timu ya kampeni ilikuwa ni jambo la kuzingatiwa.

“Baada ya kupata ushauri wa kamati ya uongozi kwa ushauri wa kamati mbili zilizoujadili muswada huu, sasa dhana ya kuidhinishwa kwa timu ya kampeni naomba iondolewe na badala yake wagombea wawasilishe orodha.”

Mapendekezo hayo yanahusu pia kuondoa ulazima wa mgombea kupata ridhaa ya msajili wa vyama vya siasa au ofisa mtendaji mkuu wa kata kuhusu gharama atakazotumia katika kampeni.

“Lakini pia mabadiliko haya yanagusa siku za kuhakiki na gharama za mgombea kupunguzwa kutoka saba hadi tano,” alisema Werema.

Msimamo mpya wa Werema unaunga mkono hoja mama ya Dk. Slaa kuhusu vifungu hivyo vya sheria. Hata hivyo, serikali haijaomba radhi kama alivyokuwa ameahidi mwanasheria huyo.

“Aidha inapendekezwa kufanya marekebisho katika kifungu cha 24 (1) kwa kupunguza siku ambazo kila chama cha siasa kitatakiwa kukamilisha mchakato wa uteuzi wa wagombea ndani ya vyama kutoka siku 21 hadi tano kwa lengo la kuainisha dhana ya siku iliyopo kifungu cha 9 (1),” alisema Werema.

Mbali na sheria hiyo, sheria nyingine zinazofanyiwa marekebisho ni ile ya Benki Kuu, Sheria ya Mwenendo wa Makosa ya Jinai (Criminal Procedure Act) na Sheria ya Magazeti ya mwaka 1976.

Kwa upande wa sheria ya magazeti, mapendekezo ya muswada huo, yanalenga kuondoa ulazima wa kuwepo kwa washauri wa mahakama wakati wa kusikiliza mashauri ya kashfa za magazetini (defamation) na badala yake watakuwepo pale tu mahakama itakapoona ulazima.

Baadhi ya wabunge waliohojiwa na Tanzania Daima Jumatano, walisema kwa nyakati tofauti kuwa ndani ya mfumo wa serikali kuna kasoro nyingi.

Mbunge wa Kahama, James Lembeli (CCM), alisisitiza kuwa ndani ya mfumo wa serikali kuna kasoro nyingi, na akamtaka Rais Jakaya Kikwete kuwa makini nazo.

Mbunge wa Moshi Mjini, Philemon Ndesamburo (CHADEMA), alisema hatua hiyo imeifedhehesha serikali ambayo ilikuwa imetamba, kwa kauli ya Werema, kwamba haijachomeka kipengele hicho kinyemela.

“Hii ni fedheha kubwa kwa serikali hii. Huu ni ushahidi tosha kwamba Dk. Slaa alikuwa sahihi wakati analalamikia vipengele hivi,” alisema Ndesamburo.

Chege & Temba ft Wahu Mkono mmoja (EXCLUSIVE official VIDEO {HD}

THIS IS AFRICA.

Rovos Rail train derails in South Africa: Two dead

A luxury train has derailed near the South African capital, Pretoria, killing at least two people.

A further 25 people have been taken to hospital.

The train is run by Rovos Rail, which offers holiday trips in its wood-panelled trains, according to the company website.

The AP news agency says the train was carrying 46 passengers and derailed near a station outside the city - the reason for the acciden

MNARA WA TIGO WAANGUKA BUNDA



kutokana na mvua kubwa na upepo, mnara wa mawasiliano wa TIGO umeanguka katika wilaya ya Bunda, bahati nzuri hakukutokea uharibifu wa mali wala uhai zaidi ya mnra wenyewe.